Тасқыннан қорғануға бөлінген 1 млрд теңге жымқырылған
Парламентте ҚР Қаржылық мониторинг агенттігі төрағасының орынбасары Жеңіс Елемесов су тасқынына қарсы жұмыстарға бөлінген қаражатқа қатысты дауды түсіндірді, деп хабарлайды Ulys.
«Қаржылық мониторинг агенттігі гидротехникалық құрылыстарды салуға бөлінген бюджеттік қаражатқа қатысты 4 қылмыстық істі тіркеді. Ұлытау, Ақтөбе, Қызылорда облыстарында және Алматыда осы істер тергеліп жатыр. Бұл қылмыстық істердің басым бөлігі бюджет қаражатын ұрлау фактілері бойынша қозғалған. Бір жағдайда арнайы осы бөгеттерді күтіп ұстаудағы заңсыз әрекеттер себеп болды. Осы істер бойынша 1 млрд теңге шамасында залал келтірілгені анықталды», — деді Ж. Елемесов Парламент Мәжілісінде тілшілер сұрағына.
Оның айтуынша, бұл заңсыз әрекеттер өткен жылдары жасалған.
«Осы қаражат биылғы көктемтегі су тасқынына қарсы бөлінген 140 млдр теңгеге қатысы жоқ. Қазір игеріліп жатқан осы қаражаттың мақсатты жұмсалуына мониторинг жасайтын боламыз», — деді агенттік өкілі.
