Маңғыстау облысында коронавирустан әскери қызметкер  көз жұмды. Бұл туралы қоғамдық коммуникация орталығында өткен брифинг барысында облыстың бас мемлекеттік санитар дәрігері Е.Сыдыманов мәлім етті.

Қайтыс болған азамат - Мұнайлы ауданындағы Батыр ауылының 40 жастағы тұрғыны.

«Ол 20 сәуір күні ыстығы көтеріліп, қатты ауырған соң жедел-жәрдемге хабарласқан. Оның жедел-жәрдем шақыртқанға дейін үйінде бір аптадай ауырғаны анықталды. Бірден карантиндік стационарға жатқызылып, зертханалық сынама алынған. Сөйтіп, Covid-19 вирусын анықтайтын тест тапсырады. Алғашқы рет тест нәтижелері теріс болған. Екінші рет тест нәтижелері оң болып, науқастан ПТР диагностикалық зерттеу нәтижелері бойынша COVID-19 диагнозы нақтыланды. Әскери қызметкер Ақтау қаласын дезинфекциялау жұмыстарына қатысқан екен. Марқұмның артында әйелі мен 5 баласы қалды», делінген хабарламада.

www.coronavirus2020.kz сайтының мәліметінше, COVID-19 вирусынан барлығы 25 адам көз жұмды.