«QAZAQSTAN» АРНАСЫНЫҢ ЖАҢА МАУСЫМҒА АРНАҒАН ЖАҢАЛЫҒЫ МОЛ

1 қыркүйектен бастап күзгі маусымда «Qazaqstan» Ұлттық арнасы 14 жаңа жобаны эфирге шығарады. Ал осыған дейін көрермен ықыласына бөленіп үлгерген 10 бағдарлама жаңаша форматта қайта ұсынылмақ.

Атап айтқанда, Қазақ телевизиясының корифейі Нұртілеу Иманғалиұлы енді Ұлттық арнадан сөйлейді. Әр апта сайын арна эфирінен интеллектуалды диалогқа құрылған «Nur Tileý» бағдарламасын тамашалай аласыздар. Ал «Мәселе» тізгіншісі Нартай Аралбайұлы көрерменмен енді тек сенбі емес, күн сайын кешкі уақытта жаңа «Ашық алаң» ток-шоуында жүздесетін болады. «Apta» ақпараттық-сараптамалық бағдарламасын жаңа маусымнан бастап белгілі журналист Жайна Сламбек жүргізеді. Күн сайын үш мезгіл тікелей эфирде шығатын «Aqpatat»-ты Армангүл Тоқтамұрат, Саламат Омаш, Шерхан Жамбылұлы, Альбина Әшім тізгіндейді.

Гүлназ Әлімгерейді күзгі маусымнан бастап мұқтаж жандарға көмек қолын созуға бағытталған жаңа «Niet» әлеуметтік жобасынан көретін боласыздар.

Бұдан бөлек, арна эфирінен апта сайын public talk форматында «Сен де бір кірпіш дүниеге...» әлеуметтік-қоғамдық жобасын ұсыну жоспарланып отыр. Қоғамдық, ақпараттық-танымдық бағыттағы «Иман өзегі», «Бір күн», «Мәдениет жауһарлары» хабарлары да көрермен көңілінен шығады деп үміттенеміз.

25 тамыздан бастап Гүлназ Ауданбаевамен бірге ауыл өмірінен сыр шертетін «Ауылдастар» тележобасы эфирде.

Кезінде көпшіліктің ықыласына бөленген «Толағай» отбасылық бағдарламасы да осы жаңа маусымда эфирге қайта оралатынын қуанышпен хабарлаймыз.

Тағы бір ерекше атап өтер жайт, жаңа маусымнан бастап көрермен «Qazaqstan» арнасы түсірген бірнеше отандық телехикаяны тамашалайтын болады.