«ТҮРІК ӘДЕБИЕТІ» ЖУРНАЛЫ ҚАЗАҚ ӘДЕБИТІНЕ ТҰТАС БІР САНЫН АРНАДЫ

Бауырлас Түркияның айына бір рет шығатын «Түрік Әдебиеті» (Türk Edebiyatı) журналы шілде айында шыққан санын тұтастай қазақ әдебиетіне арнады.   

Қазақ әдебеитін түрік тіліне аударып, бауырлас елдердің байланысын тереңдетіп жүрген жас түрколог  Др. (PhD) Омер КУЧУКМЕХМЕТОГЛУ өзінің фейсбук парақшасында сүйншілі хабар туралы жазды. «Мен редакторлық ететін басылымның қазақ әдебиетіне арналған арнайы саны Түркияның Стамбұл қаласында жарық көрді. Аталған санға қазақ әдебиетінің алыптары: Абай, Мұхтар Әуезов, Мағжан Жұмабаев, Бейімбет Майлин, Міржақып Дулатов шығармаларымен қатар ХХ ғасырдың ортасы мен ХХІ ғасыр әдебиетінің көрнекті өкілдері: Жұмағали Сайын, Баубек Бұлқышев, Мұқағали Мақатаев, Берік Шаханов, Сәбит Досанов, Талғат Кеңесбаев, Ұлықбек Есдәулет, Ерлан Жүніс және Ақберен Елгезек сынды қаламгерлердің шығармалары енді. Бұл жұмысты мен Қазақстанның мәдени астанасы саналатын Түркістандағы Қожа Ахмет Яссауи университетінің түркология институтында директорлық атқарған кезде қолға алған болатынмын. Қыруар шаруаға қарамастан біз осы басылымның сапалы шығуы үшін кітапханаларда отырып, біраз іздендік. Осы орайда маған қол ұшын созып, көмек берген баршаңызға алғысымды білдіремін. 
Сонымен бірге, аталған санымызда шығармалары, мақалалары мен аудармалары жарық көрген ғалымдар мен қаламгерлерді, әріптес аудармашыларды құттықтаймын! Сондай ақ, Бахтияр Аслан басшылық ететін «Түрік әдебиеті» журналына ерекше құрметімді білдіремін! 
Түркия мен Қазақстан қаламгерлерінің шығармашылық байланыстары жандана берсін деген үлкен үмітпен ...» деп жазды түрколог.